Chatze? Dünns Iisch – isch scho fei guet drüber gschribä worde, u hei di meischte ihri eiget Chatze- Gschichtenä zum brichtä im trauten Kreise und so. Aber itzä – chunt mir haut nüt bessers i Sinn, u drum…… Wo ni hiä häre bi Züglet, si einigi vo denä Chatzeviecher so ums zHüsli gschtrielät – auso, dä wo uf mi Pfäffermünz (es isch de no a Nadu Münzä gsi) gmarkiert het – zersch gnüsslich dran gschnupperet, när zFudi uechä, mit em Schwänzli zitteret u hüh gib im, vo drübert. Mir wärde vermuetli nüm Fründä… Pfui, ää-ääh, abfahre blöds Viech… I meinti haut Pfäffermünzsirup a la Katzenpisse – nö. Cha nüt sy. Aber eini, fei viff, grau mit chli wiis gschlirket isch öppä am Morgä wo ni richtig Büez los zogä bi im Gras gläge, het aus gluegt… Hani mau es Bögli zuechä gmacht – vilich hallo säge, chli chräbelä? Nid mau vilich, isch si dervo, u het mi aagluegt wi:

U du? … Frömdä Fötzu, was wosch i mim Läbe?…

U chuum bini so wit wäg, das cherä u irget öppis usrichte nüm lohnti – stouziert si zum Hüsli – luegt arrogant übere – ätsch – du mir ou… Tja – bin i nid gfragt – chan i so näh macht nüt. Het aber das Viech haut mis Komposchtnetzli gfungä u dr Inhaut grossflächig verteilt – Chäsräuft si schinbar wit obä uf em Menue Salatbletter nid… aber immer wenn i chumä wird bös gluegt u abghouä.

Ischs mittllerwilä wider Winter – hani das de Nachburä verzeut bim Kafi, und es tüeg mir scho leid, i wöu de nid öppe ihri Chatz … ah, di sig nid ihri, ja di chäm öppä ou zu inä…Ja, de miechs nüt, wenn ig ihrä chli Chäsräuft u so gäbi? (Dr Komposcht hanget mittlerwile, ma nid immer wider zämeläse…) Und aus öb sis ghört hätti, steit si mau da und macht miau – mit em ne Piepsistimm ganz fiin. U so fahts haut aah – gönn i däm Tier doch, Foodwaste isch doof. Hei mir mittlerwilä fei e Symbiose – ischs es angers hei cho, ligt das Tier uf em Gländer, u meischt durets wenig vo dert wo dr Töff abgsteut isch, bis di Puusle motoret… Si aber natürli Ritual, Abloif zbeachte:

Wird mau ufgluegt – ahh oh scho da? hmmm. Mau ufhockä, blinzle, e Haubmeterchatz gäge füre, dr anger haub Meter gäge retour gäh, e churze Schläck, no mit em Pföti hurti überä Gring – für Disä simer präsentabel gnue – schmöcki schmöcki lueg – „toink“ mit em Chöpfli dra häre – auso, los chräbel er mal… U meischt wirds de gad chli guet, mues me Chopf a Chopf, unger em Chini dürä – ü da hei mir dezidiert Differänze- vor luter Wöhli tChraue dür tTöffhosä its Bei inä lah u ziä? Vilich für di – für mi? Danke – aber nei danke – näme mir die Pfötli gschider itd Hand… U sclussundamänd mues me du när uf e Chopf ufe chräsme, und isch me immer wider erstuunt – diser isch rund, dä Chopf und es geit hinger abe…… U du isch meischt guet. Bini äuä dr momentan Läbesabschnitts-heschnidgseh – hani aber klar dürä gäh, meint i ämu:

Auso, Liebi chasch ha soviu du wosch – wärdi das schiinbar meh, je meh me dervo gäbi – u wet richtig hunger hesch – Müüs fah weisch ja wiä – Wasser hets im Brunnä … Aber natürli – mittlerwilä gits nid numä tRäuft, sondern öppä no chli Chäs, e Zipfu vor Wurscht, luegt me das no chli Fleisch am Chnochä isch… Passt scho – geit si u chunt wi si hiä würd wonä. I chumä u ga wini wot u wonä tun i ou. Früecher, im ne stressigere Teil vo mim Läbe hani mir vor gno: Wenn i khei Zyt me fing, a Chatz zschtriechlä – müess i mis Läbe änderä… dermit meini heig i geng no rächt.

Faus oppäer fragt – i ha khe Chatz – e Chatz het mi.

FE August 23