Ja, wär mag sich nid erinnerä – passiert e Seich – het me e Schissdräck gmacht oder öppis boosget, oder vilich numä Was nid verhinderet was äbe hätti söuä-chönne verhinderet wärde – weti me ja khe Rätschibase sy – oder het me Öpper la drii loufä – viu sis nid besser verdient, di hingerfotzig Huderä, di blödi…
Ja – da hets du öppe Schimpfis gäh.
Schnäu giuts zlehre, wän mues me für was frage und wenn ischs besser um Verzeihig zbitte ansteu vo dr Erloubniss. Mängsmau isch „eifach mache“ pertinänt – geit erstuunlich guet, wenn die benutzti Infrastruktur wider perfekt hingerlah wird wi mes het vorgfunge. Ja. (Wet haut es Töffli „vertlehnsch“ muesch haut dr Tacho abhängkhe u nachetanke wes haut wider mau wosch bruuche, des Nachts…)
Der bescht Fau isch haut znid la verwütsche – geit aber natürli nid immer – drückt je nach je zGwüssä deräwäg das mes von alei geit gah biechte…
U isch me sich ungerenang ou nid immer einig – di einte hei fei mit de Wort chönnä, di anger gärn öppe mit de Füscht argumentiert – bi de meischte vo dererart isch aber de glücklicherwiis irget eis mau tErkenntnis cho – hmmm – hei mir ungerenang es Veieli, e Platti Nase, Preuige, Schürfige und rundumä tuet aus weh … wird tMueter vom Zuestand vo dr Bechleidig ou nid gad erbout si… si aber khe Schritt witer, u sone richtige Held isch äbe eigetli ou kennä…
Hei da diä wo öppis zsäge hei auergatig verschidenes druf gha um dr Missmuet, dr Ärger und tEntüüschig überä zbringä. Die Eintä bouiä sich vor eim uf, bichömmä e rote Chessu u bäge mau e rundi. Auso aabäget zwärde cha nüt si, aber wet lut wirsch, besteit haut geng zRisiko lächerlich zwürke.
Angeri schüttle nur mittleidig zChöpfli u säge wi unändlich truurig und entüscht si sigä und hätti sis de niä dänkt vo eim… oh nid aagnähm, aber äbe. Für mi si di schlimmschte diä, wos eim erkläre – was äbe di Tat aus hätti chönne u het bewürkt. Das isch ja rächt u guet – het mes meischt säuber scho gschnaut, mache sis aber nid einisch sondern immer wider vo vor. Gfüeut hundert mau het me sich entschuldigt, u sorry, ich maches niä meh gseit – aber nei – chunt me zwenig zerkirscht, reuig oder zertört überä? – was weis ig?
Het mir leider damaus di nötig Confiance kopplet mit em geischtige Schuggi gfäut um chönnä tsäge: Hey, I bi scho am Bodä – muesch nüm dri stüpfe… Was gange isch hani begriffä – i wet mi uf zwider guet mache konzentrierä …
U du chunt me haut its Auter wo me ou zschimpfe het, entüscht und schockiert isch… Macht mes besser? Emu sicher nid immer. Zeint oder anger mau wär i gärn retour, u hät anger Wort gwäut, hani haut gemrkt, füehlt sich dr Beschimpft aagriffe oder gar beleidigt – het mes nid überä bracht oder gratet me wäg vo der Sach.
Isch itz scho baud ewigs här, hei haut di eintä uf em schuuwäg so chli vo hinger em Zuun dürä bäget was mir für Schafseckel, Gesocks u no viu meh sige. Si ig u dr Kolleg fei baff gsi – hei mir gad nid chönnä umä gäh, isch üs derigs Greed eigetli nid erloubt gsi, hei mir aber du gmeint – nö. Choi mir üs nid la gfaue. Hei mir auso trainiert:
U du? Verdammdti Moschtmiubä, verkakkts Stück Scheisse was de bisch – nid mau em Tüüfu ab em Charre gheit – nei- du misslungnigs Labor Experimänt – isch öppä i dim Chopf fieschter, TBirrli klepft, tSicherige dürrä – aber de dünkler aus ire Chuä drin-innä – im Gotthard Tunnäu – nach em Atomare Erschtschlag, u geit me mit em Ohr dra häre, a di Usred vomene Gring ghörsch zMeer ruuschä… Dubbu, Vanille Cornet … u i dämm sinn witer…
… natürli gäge tUhr, Widerholige verbotä u wet einisch stagaggelisch – nochmals von vorn.
U znächscht mau hei di Schnudderbuebe de haut e Wouche vertwütscht – ha ig nid witer gwüsst, isch dr Kumpel iigschprungä – veritabel verbal iigseift hei mir si.
Auso – Mit dr Schimpferei gsehnis so: I wet eigetli nid tContenance verlürä – i chas nid immer – findes aber besser öppis zsäge, wi ou gseit zsbicho aus es muffs Aazschwigä…
Aber für hüt isch guet u znäscht mau de wider chli liechteri Choscht – hoffen i ämu…

FE Juni 23