Ja also – hatten wir da fang eis mau die Greta. Auso zfride het die no nieä driigluegt won ig se gseh hätti – aber villich ligts haut am Klima um sä umä – wär weiss?… Vou fau het die de mau gäbig allen höchen Tieren die Meinung gegeigt – me cha ja derfür oder dergäge si – für das het si mi Reschpäkt.
U du nimmt si hurti kschnau ä schnittige Sägler für übere Teich. Weisch wie schön – das Ding ruuscht äuä fei, so ex „round the world“ racer. Ja, was wosch – nach mirä Kenntnis het bis hüt nur einä chönnä übers Wasser gah, seit me ämu – wär aber gad chli wit. Fahre chasch übers zWasser mit Outo, Töff, Schneemobil muesch aber fei Gummi gäh, darfsch ja nid la abrissä, u sött chli glatt sy zWasser… wär aber äuä nid im Sinn vo ihrem Programm.
Foufäu hurti kschnau drü tonne Carbon verbout für dä Kahn hei si – auso – Carbon – fiber, nid öppe de das vo dr Luft. U itz, dass mir üs gad richtig verstöh – i ha de nüt gäge Carbon – im Gägeteil. Fei es Wunderding was me da drus aus cha bouä… eifacht de bi end of life mit hurti komposchtierä u guet isch de nüt. U bis es de so i dr Form isch wi gwünscht o nid ganz ohni – isch zwar gflochte – aber zum lisme ischs nid gäbig – aber item…
Wo de eis so ne liecht hysteriösi Tschuppelete Girls mit Plakatli früsch vom Zuekunftsprodeschtli so i eirä Wuet um mis Outoli umähüpfe u furt mit derä Stinkchischte skandierä – gits mir gad chli Stoff zum nachedänke.
Auso Jute statt Blastigg isch derte nid. Si die Dame zum teil fei ufbreezt – u vo denä Turnschue chömä garantiert kener us dr Landi. Wird’s du de mau grün, auso tAmple, süsch nüt und i stinke haut gemächlich von dannen. Die Hysteriösä göh widerwiuig flink dänn, bichöme si fou fäu baud es Gjufu, fasch chli e Numere die Jonglierei zwüschem Plakat, em Händy, und em Handtäschli.
U du merk i plötzli: I bi äuä genau dä wordä, won i mi i däm Auter wi diä gschworä ha niä tsy – e bidere Füdlibürger haut. Aber immerhin – ha no kheni Beige Chleider… geng das.
Ja u wo ni so uft tOutobahn gondle dänk i so tja, die Dame – aues guete fürt Zuekunft – u das nid nur für e Fritig. Was dir ou machet, gloubet dra u häbit Freud – wenn i öppis us mir Zyt uf derä Chugle glehrt ha – wes söu wahr wärde, vorwärts gah wirds irget eis i Arbeit usarte – wet vom ene Oligarch gfischet wirsch gits äuä eifacht angeri Prioritäte
Ja, u bim Fürabebier verzeu is de Kollege – potz – hei diä nid Freud: Wohlstandsverwahrlost, weltfremd verwöhnte Kackaffen… ja und um e chli zde-eskaliere verzeu i vom Outofreiä Sunntig.
Hie numä ganz churz für e chli Konteggscht – quasi. Simer i de Achtzger Jahr, vou chaute Chrieg haut, und üs wird verzeut der Waud stirbi itz de gad, aus kaputt, tSchiissi isch riisig…
Nid gäbig, so jung u vou im Saft – wet nid im ne Piuz atomisiert wirsch – verrecksch wiu aus rundume verräblet. Blöd. U du chunt haut de di idee, nid vo üs, das a eis zwe Suntige der Chlapf doch chöntsch diheime la.
Simer so drü Jugetlichi – üser Euterä schaffe au im ne Heim für geischtig behinderti Mitmönsche.
Hei mir gmeint, mir setzi doch mau di Idee – üüh dir – was si mer abblitzt. Sicher nid, Blödsind, abfahre, was meinetir eigentli – cha jedä säuber entscheide a welem Tag gfahre wird oder äbe nid, Schnudderbuebe, naivi – tüet mau bi euch aafa…
Si auso üser Egöli liecht knigget, füehlä mir üs aapisst, gäbig…Löh mir das uf üs la sitze? Nö, sicher nid – nid mau vilich.
Guet, Auso – darf ja nid uffaue – hei mir es paar Wuche la vergah.
Zu der Zyt isch es Privatouto nid gad saubschtverständli gsi, aber di Institution het gäbig Chäre u Bösli. Hets es Büechli, wo igschribe wird wär wenn wiviu und es Brättli mit de Schlüssle. Hei mir auso e Sunntig gwäut wo fei Fahrzeug reserviert si, aber chli zytversetzt. U du haut spät des nachts liselig tHubä uf, Batterie abhänke, e fini Schicht durchsichtigs Chläbi um e Pol und wider drah… Schlüssu dräihe – nüt – guet, dr nächscht.
U itz mues i haut du öppis biechte. Mis Mueti het es eigets Outo. Isch si haut tChrankeschwöschter vo der Institution, u het im ne Notfau hurti mit em Gfaunig-in-Not its Spitau müessä we si nid säuber het chönnä flickä.
Dr Schlüssu han i scho gmugget gha, aber du isch mir i sinn cho – shit, was de wenn einä plötzli würkli öppis het?
Nun ja – han igs de Buebä verklikkert – und gmeint, i chönni de nie meh schlafe, wenn de irget e Mönsch zuschaden chämt, wiu Muetis Outöli „en sabotage“ ischt und so.
Tja, haben die dann schon gmötzlet und gemeint wenn schon denn schon alle u dermit eigetli ou rächt kha.
Ja, okhey, i dämm fau hie sig dr Schlüssu und ig wüssti de vo nüt… het ne haut o nid passt, u hei si de gmeint wenn ig chönnt garantierä das zMueti aber de sicher nur im üsserschte Notfau – das hingäge gängt hani gmeint… Si müessi aber au cho zVieri näh zu üs…
Jä äbe, öbs de die säuber gmachti Vanille Creme u tGüezi vo Norwegä git? ( I mues schwingbäsele wi wiud u chnätte wi ne morä – derfürä darf i usschläcke – u abwäsche – isch Tradition…)
Eeh daich…
Eigentli hei mir fescht dermit grächnet vertwütscht zwärde – so vom riisä Donnerwätter mit Usgangssperri bis zur Verbannig inäs Internat hei mir üs aus usgmaut – aber nüt haut. Hei sis üs nid zuetrout, oder üs der Erfoug wöuä vergälle? Khe Ahning.
Hei mir denne hinger em Vorhang fürä glüslet – si si cho einä nach em anger u hei frohgemut iglade. TSchlüsseli dräiht – u nüt. Einersits si mir üs fei grossartig vor cho u angersits wi richtig Dräckseck. Wo de e ganzi Familiä mit chlinä Chind dr Tagesusflug het müessä striichä – üüüh dir – wär i gärn i Bodä versunkä.
Ja, und ir nächschte Nacht – aus wider idt ornig gschrüblet – wei mir doch am Morge itd Schuel chauffiert wärde… „Schweinebacken R us“ würd me hüt gloub säge.
Stöh mir auso da, chunt der designiert Chauffeur u meint: Buebä u Meitschi – dir heit Päch – dr Bös isch kabutt, müesst säuber luegä … Cha nid sy mein ig, die gö immer. Moumou – dä miech khe wank. Quatsch – hesch öppe dr Schlüssu nid richtig draiht.
U so hin u här – bis er enerviert haut probiert het – kla-brummm hets gmacht. Iistaigä – abfahre hani gmeint u mir fei zLache müesä verhah.
U vili Jahr später hani mit Mueti tJugend la revue passierä – potz hani gschtuunet wiä viu si gwüsst het. Potz kheit si us aune Woukä was i no cha obä druf legä.
Hei mir ämu fei chönnä zäme lache.
U hütigstags? Suppä uf Biuder wärfe, wo me nid säuber gmaut het? Sich aachläbe ut tLüt schiissig mache? Ischs äuä zPrivileg vo dr Jugend zproteschtierä, lutstarch Änderigä aber subito zforderä.
Nun ja – mit em Füdlibürgertum chunt haut ou tErkenntnis: Änderigä? mira scho – aber langsam pressierä. Chunt nid guet, gar nid guet wes erzwängelisch muesch nur chli retour bletterä ir Gschicht – het gnueg Bispiu.
Hei si doch da letschthin sones Brüggli bout, wo me obe drüber cha während dessi unger Strass revidiert wird. Hurti so eini i chli bouä u drüber legä – chönnt me numä no säge: Und wenn sie nicht gestorben sind dann kleben sie noch heute.
FE Jan. 23